Jam 1 | KYG | STEP | Nagaemo Yemisi'namo Goti'e Ala kava ne'mo Yesu Kalaisi'e'mo ali'ya'anile'mo mai'nove. Nagaemo tuolofu'a Yu nofi vaya'mo kotapimo ataletapa atagu faetapa uteta hu'naya vaya'mogitapae'mo ge lapamamae'na mani avo'mo nekaove.

James 1

1 Nagaemo Yemisi'namo Goti'e Ala kava ne'mo Yesu Kalaisi'e'mo ali'ya'anile'mo mai'nove. Nagaemo tuolofu'a Yu nofi vaya'mo kotapimo ataletapa atagu faetapa uteta hu'naya vaya'mogitapae'mo ge lapamamae'na mani avo'mo nekaove.

O'ataletapa Gotifeke'mo ge hutapa afi gegeno lapamino, huno hapa pai'niya gemae

2 Konaga'nimogitapae, lapakaetegamo asole hanageke kavapi'mo asagautapa ai'nisa'mo'mo lapamalageka nehisigetapae'mo alopa lamogaga aisuna agufa kava'mo afole ai'niye, hutapa lapakesamo afiyo. 3 Ago afi'nayana hanageke kava'mo'a lapakesa afita fatago nehaya kavatapile'mo lapamalageka nehisigetapae'mo o'ataletapa lokiya vaitapa maisayafe'mo ani kava'mo'a lapaipafi'mo ali'ya'mo aligiye. 4 Lapaipafi'mo ali'ya'mo alisiya kava'mo ka akanitapa o'ategeno'ao alagi o'ataletapa lokiya vaitapa maisaya himamutapimo alagepa huno ko sino afu lesigetapa haita me otaletapa haitapa hapaigae. 5 Lapakaepati'mo mago vekamo'a ageteno afi'niya kava'amo mago'e huno o'ali'nisiyana Gotife'mo ge huno afi genageno'ao Goti'a ge ohaugiyanageno muki vaya'aina mago'e huno alino ne'apamiya vekamo'a alino amino. 6 Amigiya'monanafa lole agesamo o'afi'neno alagepa huno agesa afino fatago hu'neno'ae'mo ge huno afi gegaiye. Lole agesamo ne'afiya vekamo solovala anite'mo yasimo ne'aligeno'ae'mo aino holakau holakau hulino uneno nehiya agufa anikana huno mai'niye. 7 Agaemo magoke kavafe'mo agesamo o'afi'nifa lole agesamo ne'afiya vekamo mai'niya'mofe'mo Ala kava netegati'mo mago ya'mo afa'a o'aligiye. Fiku yanageno alitegauve, huno agesamo afigiye.

9 Apaki ohane'niya konagatimogi apaki'apile'mo Goti'a alino asaga huno apate'niya kavafe'mo apamogaga aiyo. 10 Kagemi ya'api'e vaya'mogi apaki'apile'mo alino afepi apate'niya kavafe'mo apamogaga aiyo. Yosa ausemo heno hifaliteno hali hu nelamiya kava hu'a faligae. 11 Yegemo'mo haineno ne'agesigeno'ae'mo lusi kava huno amuko hu'nigeno kahaumo leno falu netegeno'ae'mo ause'amo hali hu nelamigeno'ae'mo konali ya'amo alagi hano nehiye. Ani kava hu'a kagemi ya'api'e vaya'mo ali'ya'apimo ne'alisaya folagapati'mo atale'a faligae.

12 Hanageke kava'mo'mo apamalageka nehisige'apae'mo o'atale'a atafau'a alagi hu'a mai'nisaya vaya'mogi Goti aulagale'mo alagepa hu'a ne'maiyanage'a afa'a apamogaga aigae. Na kava hisige'apaene. Apamalageka nehisige'apae'mo o'atale'a atafau'a alagi hu'a mai'nisageno'ae'mo Ala kava ne'mo'a, nagaefe'mo hapau'niya'mofe'mo alagepa hu'a maige maige hu'a maisaya ya'mo ali'na apamiguve, huno hu'niya ya'mo aligae. 13 Apamalageka nehisiya vaya'mogimo, Goti'a hosu kava hisunafe'mo layate ne'aliye, hu'a apakesamo o'afisaya kava'mo hane'niye. Mago vekamo'mo Goti'a hosu kava'mo hisiyafe'mo ayate afa'a o'aligiye. Goti'a vaya'mogi hosu kava'mo hisayafe'mo apayate no'aliye. 14 Apakai'api apakufamo'mo hau'niya kava'mo'a apayate alino heno apavayu hulino hosu kavategamo ne'viye. 15 A'nemogi apaipagu'e'mo maite'a mafa'nemo ali'a ne'apataya kava huno apakufamo'mo hau'niya kava'mo'a aipagu'e'mo maiteno hosu kava'mo alino ne'ate. Hosu kava'mo alino ate'nigeno ko sino alopa heno mai'neno'ae'mo nefaliya kava'mo alino afole aino ne'ate. 16 Nahau'niya konaga'nimogitapae, humi lapatesayafe'mo hisaya gemo alagi o'afiyo. 17 Goti'a muki alagepa ya'e haino hapai'niya ya'e'mo fiku alino ne'apamigeno'ae'mo koku'napati'mo emine'niye. Muki koku'nate hane'neno aeno ha neleya ya'mo'a alu kava alu kava'mo huno aeno ha neleya'monanafa ani aeno ha neleya ya'mo Afo'amo'mo aeno no'atagaeya vekamo'a alu kava alu kava'mo osuno magoke agufa kava'mo huno fiku alino ne'apamiye. 18 Agaemo hau'nigeno muki alo huno apate'niya vaya'mo aeta apakaseta maisunafe'mo lama ge'aleti'mo alino late'nigeta mafa'ne'amo mai'none.

Goti ge'amo fiku o'afita afitetapa akame hiyo, huno hu'niya gemae

19 Nahau'niya konaga'nimogitapae, ge'aleti'mo alino lapate'niya'mofe'mo muki'amogitapamo ge'amo afisayafe'mo lapayamukiki hutapa afiyo. Gemo hugefeke'mo vase vase hutapa ge hiyo. Lapaipamo legefe'mo nehisigetapae'mo vase vase hutapa lapaipamo leno. 20 Na kava nehiya'mofe'mae. Vaya'ai apaipamo neleya kava'mo'a Goti fatago kava'amo alagi alino afole aino no'ate. 21 Inagi muki hosu o'ani'ya kava'mo lapaipafi'mo havai te'niya kava'mo alita ataletetapa Goti aiyafi'mo ape huta mai'netapa lapaipafi'mo ago fai'niya ge'amo aliyo. Ani gemoke'mo lapakufamo alino katino lapategaiye. 22 Goti ge'amo fiku ne'afisayana lapakaitapie'mo humi lapategayanagi fiku o'afitapa alagepa huta afitetapa akame hiyo. 23 Fiku afiteno alagepa huno akame nosiya vekamo'mo vaya'mogi lave'yofati'mo apaugosamo ne'agaya kava huno ne'maiye. 24 Lave'yofati'mo augosamo ageteno ataleno ne'uno'ae'mo, haiya agufa naugosa'e vekamo mai'nofi, huno agesamo no'afifa malage huno ago age nekaniye. 25 Age nekaniya'monanafa mago vekamo'a Goti ke'aepa ge'amo'mo haino hapai'niya kanale ge'aleti'mo hatu maeno ne'apateya ge'ale'mo aulu haeno age'niya gee'mo age okanino agesa afifi nehuno akame nehisiyana kanale hugiye. Muki kava'amo nehisigeno'ae'mo Goti'a alagepa huno ha maegaiye. 26 Mago vekamo'a, mono vekamo mai'nove, huno agesamo afi'neno'ae'mo avayale'mo alagepa huno o'yagaino hosu gemo nehisiyana mono nehiya kava'amo ina agufa kava'mo hane'niyanageno alagi ha o'maegaiye. Agai'ae'mo humi ne'ate. 27 Goti'a muki ya'mo afo'amo aulagale'mo alagepa mono nehaya kava'mo hane'niyana kogu a'nemogi'e megusa mafa'nemogi'e'mo kanamo ne'aliya afina'mo u'a hapa maege ma mopafi vaya'mogimo ali'a hosu hu'a o'apatesayafe'mo apakai'apile'mo alagepa hu'a yagai'a apatege hu'a ne'maiya kava'mo hane'niye.